【當「同熱愛這片土地」即將變成「你考慮移民未？」】
近期同老友聚頭，除咗呻下工作苦悶，
講下感情生活同埋鬧下政府之外，
好似成日都會傾到「移民去邊到」呢個話題。
原來上年 BNO 減價，好多老友都已經紛紛比錢續咗。
除咗兩證在手有互補作用，亦都為咗搏個近乎渺茫嘅可能性，
睇下會唔會有日可以拎住本 BNO 成為英國公民。
問到做英國二等公民好咩？某個友人當時咁答：
「唔係英國好，只係香港只會愈來愈衰。」
講完，大家都用沉默來表示同意，剛好甜品香蕉船送到，
另外一個友人無奈咁講：「嗯，今次真係食蕉啦。」
記得04年仲讀緊中學嗰陣，有首當時幾紅嘅歌叫做《香港地》，
基本上身邊每位同學都聽過，唱K都一定會點嚟唱。
你地或者都仲有印象，首歌一開始係陳冠希嘅讀白：
「呢首歌，送俾我嘅香港，唔理事情有幾困難，
環境有幾亂，你都仲係我屋企，之前係，而家係，將來都係。」
然後就係大家都耳熟能詳嘅嗰句歌詞：
「同熱愛這片土地，大家刻骨銘記，愁或喜，生與死，也是香港地…」
可能係因為03年經歷完各種大事，又戰勝沙士、
又五十萬人遊行迫到政府擱置二十三條。所以當時聽真係好幾有共嗚，
相信有希望又肯去做一定可以守護呢個家園。
然而，十年過後，再聽一次首歌，感覺已經再唔係當初咁。
同熱愛這片土地？聽落只有淡淡嘅無奈同哀傷。
而大家刻骨銘記嘅，再唔係愁或喜，而係一件又一件荒謬嘅事。
記得有個老友曾經講過：「呢一年香港真係變得太快。
明明之前仲覺得好離譜嘅事，唔洗一陣已經有一單更離譜嘅事情出現，
接著一單又一單。過一排回望過去，會發現第一單其實真係好濕碎。」
唔係咩？
有心做嘅電視台因為一男子因素無得發牌，
無心做嘅就繼續有得做（啱啱續完十二年牌），繼續播佢嘅「愛。離地」；
立法會東北粗暴撥款，但其實都唔係第一次，望下高鐵仲有三跑；
明明當年一下偷步買車已經要問責落台，
而家特首收受五千萬無申報、劏房波新界東北囤地自肥都可以當無事發生；
民怨爆發引起雨傘革命，但政府仍然無動於衷。
警察更淪為政治工具，警黑合作、呢邊拉人嗰頭放人、
暗角七警到而家仍然逍遙法外。加上近期嘅認人可以戴口罩浴帽，
引導問題令智障人士認罪，警隊嘅信譽已經蘯然無存。
一堆奴才繼續用屎忽思考，乜嘢水車只會整濕衣服，
報案率增加係因為市民支持警方，喺社會上工作嘅人就係社會工作者都講得出口。
荒謬嘅事實在太多，根本無法盡錄。
但我諗好多人都認同一點，呢種情況毫無疑問係會繼續維持落去。
唉，其實到呢刻我都真心覺得香港幾好架。
交通方便，食乜買乜應有盡有，有手有腳肯出下力又唔至於會餓死，
娛樂方式係愈來愈少但又不至於無。
但無計，一日有呢班全家拎哂外國護照嘅屎忽鬼要賣港，
呢個地方只會變得愈來愈陌生，愈來愈無法接受。
當後生嗰陣要受盡壓迫，為層樓打生打死，又怕照顧唔到下一代，
死嗰陣連想要個骨灰龕位都未必有嘅時候…
其實諗諗下，做個二等公民可能仲幸福。
不過，要移民最大嘅問題當然係…
哪有錢，你老母.jpg
最後講返首歌，有段Rap套落而家嘅局勢都幾有感覺嘅。
「跌得起輸得起，搵塊鏡照下自已，
香港人至叻，唔駛靠人個個靠自已，
唔怕攬住一齊死，駛乜怕從頭做起，
要有訂企，首先要企硬自已。」
嗯。
---------------------------------------------------------------------------------
FB: 有心 無默
IG: https://instagram.com/echoofheart/
Search